Yann hag Emilie, perak ho peus dibabet bevañ en Eusa ?
Yann Tiersen : un istor hir m’eus gant an enezenn, deuet on amañ gant ma zad pa oan bihan-tre. Mod-se, a-drugarez dezhañ, eo deuet tomm ma c’halon ouzh Eusa… Gwiroc’h eo deuet da vezañ pa oa aet ma zad d’an anaon, da c’houde.
Anat e oa din labourat amañ. Komañset m’eus da vare krouiñ Le phare – ma zrede pladenn – Ha kendalc’het m’eus evit pladenn les retrouvailles hag ar pladennoù war lec’h c’hoazh. Kejet m’eus gant kalz a dud e Eusa ha deuet int da vezañ ma mignoned kaer. En hor bleud emaomp amañ gant Emilie ha kalz a chañs hon eus da vevañ amañ ivez…
Petra a gaver disheñvel eus an douar bras ?
Emilie Quinquis : Eusa zo ur c’hevredadig lec’h ma ‘z eo ingal an eil ouzh egile. Pep hini zo a-bouez, neuze ez eus muioc’h a zoujañs etre an dud, me ‘gav din.
Penaos peus bevet bezañ lakaet da Vrezhonegerien ar Bloaz ?
E.Q : Ur prof bras eo bet. Gouzout a ouien e oa kentoc’h evit bezañ degaset Yann d’ar brezhoneg ganin met ur prof e oa memes tra. Ur c’hoant don am boa da zeskiñ brezhoneg abaoe pell rak va mamm-gozh a gomze brezhoneg gant he bugale. Ur vaouez dreistordinal e oa hag he deus awenet kalz ac’hanon. Alzheimer he deus tapet. Kollet he deus ar galleg a oa bet lakaet e-barzh he fenn, ha deuet eo en-dro da vrezhoneg he yaouankiz. Laouen e vije bet m’ he dije bet tro da welet va gwaz ha me, lakaet da “Vrezhonegerien ar Bloaz” !
Petra eo ar gwellañ mod da gas ar yezh war-raok, ar sonerezh ?
E.Q : Bevañ e brezhoneg zo ar gwellañ mod hervezon. Abaoe ma ‘z eo ganet hor mab ne ‘z eomp nemet e brezhoneg gantañ er ger. Merzhout a reomp ar pezh a vank deomp : buhez ar yezh. N’eus ket kalz a dud hag a gomz brezhoneg c’hoazh e Eusa neuze e vez diaes a-wechoù chom hep klevout brezhoneg ar re all, bezañ difaziet hag all. Gwir eo e sikour kalz ar sonerezh hag al lennegezh, met hep tud evit bevañ e brezhoneg e vefe nebeutoc’h-nebeutañ a dud evit pinvidikaat ar yezh dre an arzoù.
Y.T : Ha pouezusañ tra evit hor yezh a vefe bezañ lakaet da ofisiel ‘benn a fin ! Perak o deus kement a aon tud bro-c’hall e vefe reoù divyezhek pe teiryezhek er vro. Loc’h zo enno da gomz ur yezh nemetken, merzhet m’eus an dra-se e pad ma zroiadoù… Ken sot int !
Penaos oc’h en em gavet da seniñ evit filmoù brudet evel Amélie Poulain ?
Y.T : ‘Benn ar fin m’eus ket graet netra ; resevet m’eus ur bellgomzadenn evit goulenn hag-eñ e vefen a-du e vefe implijet tonioù ‘zo eus ma fladennoù evit ur film. Evit bezañ onest, ma vefe ar memes goulenn hiziv an deiz e respontfen m’eus ket c’hoant peogwir m’eus kavet diaes-tre e vefe ma sonerezh staget ouzh ur film leun a glichedoù parizian. P’ emañ awenet gant Eusa ha Breizh kentoc’h… Ur spont eo din ijinañ eo skeudenn Bro-C’hall a zo staget ouzh ma sonerezh ‘vit tud zo !
Petra eo ho soñj war ar festivalioù ha gouelioù bras a vez e Breizh e-pad an hañv ?
E.Q : Reiñ a reont levenez ha startijenn d’an dud, mat eo neketa ?
Perak ober tout al labourioù-se war ar voest-noz kozh e Eusa ?
Y.T : Atav m’eus bet c’hoant sevel ur studio enrollañ en Eusa, pa ‘z eo bet an toull-noz L’Escale da werzhañ, m’eus soñjet e vefe dreist ober ur sal sonadeg hag atalieroù, ouzhpenn ur studio. L’Escale zo bet ul lec’h a-bouez-tre evit tud Eusa. Kalz a goubladoù o deus diwanet eno. Eñvor bev an enezenn eo, neuze eo arabat ober ur studio prevez ! Arabat chom hep digeriñ an nor da bep hini. Gant Eusa emañ L’Escale. N’emañ ket ganin. Ha loc’h a vefe ennon ma teufen da benn e-pad ma buhez da reiñ un draig hag a servijfe d’an enezenn…
Pehini eo al liv a blij deoc’h ar muiañ ha perak ?
E.Q : Glas, peogwir e c’hell cheñch.
Y.T : Glas evel-just, peogwir eo liv ar mor
Petra eo an eñvorenn he deus merket ac’hanoc’h ar muiañ ?
Y.T : Pa oamp o treuziñ bro Galifornia war varc’h-houarn ez eus bet ur puma – ur Mountain Lion ‘giz ma lâront du-se – e-kreiz ur forest. War a seblant en doa soñjet e vefemp ur c’hortozenn vat evitañ.
E.Q : Ganedigezh hor mab !
Peseurt lec’h ho pije c’hoant reiñ da anavezout d’ar re all ?
E.Q : Ne c’hellan ket lâr seurt traoù er gazetenn, mod-all e vefe re a douristed eno goude-se 🙂
Y.T : O lec’hioù dezho. Pep hini ac’hanomp zo liammet gant unan hag a zo ret da bep hini dizoleiñ.
Ha peseurt arzour ?
E.Q : Tarjei Vesaas
Y.T : Tarjei Vesaas. Emilie an hini eo ha n’eus roet din ul levr skrivet gantañ ha deuet eo da vezañ ma skrivagner muiañ karet, ken brav eo e skritur. Dous ha start war un dro ha ken tost ouzh an natur.
Peseurt sonerezh a blij deoc’h lakaat p’emaoc’h hoc’h-unan ?
E.Q ha Y.T : Wardruna. Ur strollad Norvegat hag a son gant binvioù Viking, ha kanañ a reont e yezhoù kozh hanternoz
Peseurt bro ‘pije c’hoant gweladenniñ ?
E.Q : Patagonia (…n’eo ket ur vro, gwir eo)
Y.T : Inizi Svalbard e norzh Bro-Norvegia. Met ret e vo diwall ouzh an Arzhed Gwenn. War a seblant eo ret da bep hini kaout un arm pa ‘z a e-maez, ‘kenkaz…
Peseurt kalite a blij deoc’h ar muiañ en un den ?
E.Q : Ar fent
Y.T : An uvelded
Petra a blij deoc’h ober evit cheñch soñjoù, goude ur frapad labour tenn ?
E.Q ha Y.T : Mont war varc’h-houarn.
Peseurt levr a yafe ganeoc’h war un enezenn didud ?
E.Q ha Y.T : Ar geriadur 😀
Ha gant piv ho pije c’hoant da vezañ bac’het en ur saverez e-pad un eur ?
E.Q : Gant Yann.
Y.T : Gant Emilie.
Peseurt meuz a rit p’en em lakait da geginañ ?
E.Q : Kig ha farz
Y.T : Bara
Dont a rafe ur voudig da ginnig deoc’h seveniñ un het, hag unan hepken. Petra a c’houlennfec’h diganti ?
E.Q : Bezañ gouest da lakaat ar re varv da zont da vev en-dro ur wech an amzer.
Y.T : Goulenn a rafen e vefe Krouet ur vro nevez gant Breizh, Bro-Gembre ha Kerne-Veur.
En ur ribourzherezh emaoc’h. Kinniget e vez deoc’h dibab ho kantved ha ho lec’h bevañ. Petra a zibabit ?
E.Q : Eusa er bloavezhioù dek ha tri-ugent
Y.T : Eusa er Ragistor
Petra eo ho «plijadur» pemdeziek ?
Y.T : Staotat e-tal ar mor
E.Q : Sellet ouzh Yann o staotat e-tal ar mor
Gant piv ho pije c’hoant da eskemm ho puhez e-korf ur sizhunvezh ?
E.Q ha Y.T : Gant den ebet
Peseurt micher ho pije bet c’hoant d’ober ha n’ho peus ket graet ?
E.Q : Kalvezez
Y.T : Labourer-douar
Dirak petra e vezit bamet ?
E.Q : Dirak ar gwagennoù
Y.T : Dirak an natur
Peseurt donezon ho pije bet c’hoant da gaout ?
Y.T : Pareañ kleñved an dud a garan
Petra eo ar c’hrenn-lavar a blij deoc’h ar muiañ tout ?
E.Q : Tamm-ha-tamm e vez graet e vragoù da Yann.
Da beseurt goulenn ‘ho pije c’hoant da respont “Ya!” ?
E.Q : “Laouen out ?”
Y.T : Graet eo bet dija… Da va gwreg !
Un atersadenn EMBANNET EN NIVERENN 648 (10/11/17)
(KOUMANANTIÑ : AMAÑ)
