Daoust hag-eñ e vo “La Ciutat” un arnodva evit an holl yezhoù minorelaet ? Bez’ e c’hellahe bout e gwirionez kar un taol-arnod hep e bar eo ar c’harter-mañ. Ur c’harter a greiz kêr Pau renevezet ha gouestlet d’an okitaneg ha d’ar sevenadur okitan eo La Ciutat. Sellet pizh e vo outañ gant holl zifennerion ar yezhoù minorelaet, a-dra-sur…
Setu ur mennozh hep e bar mah eus unan : gant François Bayrou, maer Pau anezhañ, eo bet digoret digwener tremenet “La Ciutat” e Pau. Met “qu’es aquò aquela Ciutat” mut-hu ? Ur c’harterig e karter an Hedas (e kreizig kêr) gouestlet d’ar yezh ha d’ar sevenadur okitan an hini eo. C’hwec’h pikol savadur renevezet ha modernaet a ya d’ober “La Ciutat”. Er savadurioù-mañ eh eus bet staliet kevredigezhioù peotramant obererezhioù a denn d’an okitaneg pe d’ar sevenadur okitan. Obererezhioù gouestlet d’an nevezadur m’eo an okitaneg yezh ar labour a vo staliet eno zoken.
Okitaneg, yezh ar c’harter
Er c’harter-mañ da skouer e kavo Yann Okitanegour un davarn-levrioù anvet diàr anv kan broadel Bro-Okitania “Aqueras Montanhas”, ur preti, ur vediaoueg, un egorenn-labourat voutin ha sezoù ar C’hongres Permanent de la lenga occitana, an Institut Occitan de Cultura hag ar gevredigezh “Accents du Sud” gouestlet d’ar glad sevenadurel. Ti kevread ar skolioù dre soubidigezh Calendreta a vo en ur savadur ag ar Ciutat ivez. En holl e vo staliet 35 embregerezh, kevredigezh ha stal okitan a bep seurt er c’harter-mañ, an holl anezhe a labouro en okitaneg. Alese e vo klevet okitaneg bemdez er c’harter.
Digoret eo bet gant an aotrou maer François Bayrou. Ur macronour eo maer Pau met n’eo ket ur jakobin ha tomm eo e galon ouzh e yezh : an okitaneg a vro Vearn.
Skouer Dulenn
Hag-eñ e vo ar Ciutat un enklozadenn bobo-okitanour serret àrni hec’h-unan e kreiz-kêr istorel Pau pe un okitanegva poblek hag en em ledo tamm-ha-tamm tro-dro dezhañ ? Eno emañ an dalc’h, e gwirionez. D’an nebeutañ e servijo da arnodva evit ar yezhoù minorelaet all. En Iwerzhon eo bet savet ar memes seurt karter, e kreiz-kêr Dulenn, tro Harcourt Street, gant kevredigezhioù, servijoù publik ha stalioù gouestlet d’an iwerzhoneg ha d’ar sevenadur gouezelek. Iwerzhoneg eo kenyezh an holl ensavadurioù-mañ.
Ur prezidant nevez evit an IEA-AALO
Pelloc’h er reter, met atav en Okitania : disadorn tremenet eo bet dilennet prezidant nevez an Institut d’Estudis Aranesi – Acadèmia Aranesa dera Lengua Occitana : Jèp de Montoya an hini eo. Ur skrivagnour brudet eo hemañ. Un ensavadur a-bouez evit ar yezh eo an IEA-AALO kar an tiriad okitan nemetañ m’eo ofisiel ar yezh ok eo ar Val d’Aran ha dre-se e c’hell okitanegourion ar vro beviñ en o yezh en un doare normal. Met er mare-mañ eo stegn an traoù àr ar sujed-mañ e Katalonia a-bezh a-gaoz d’ar lezenn àr an 25 % a gastilhaneg dre ret ar skolioù. Daoust ha gellout a raio ar Val d’Aran derc’hel d’e skolioù en araneg dre soubidigezh ?
Fabien Lecuyer
Ur pennad embannet en niverenn 891, d’an 8 a viz Gouere 2022.
