Ar b-panis («Panisse» e galleg) a vez fardet e gevred Bro-C’hall, resisoc’h e Marsilha. En ur c’harter kozh anvet an Estak ez eus ur porzh e-lec’h ma vez kavet panis da brenañ e lochoù bihan e koad (heñvel ouzh ur varakenn-fritez e Bro-Velgia un tamm). Plijet-bras eo an dud gant ar meuz-se tro-war-dro da vMarsilha. Gant bleud piz sisez, dour, kignen, holen ha pebr e vez graet dre vras, n’eo ket gwall start. Ar pep pouezusañ er meuz-se, a-benn ar fin, eo fritañ an tammoù panis er baelon gant eoul olivez peotramant er forn, mod-all ne vez ket graet panis anezhe… Boued ar bobl eo ar panis, blazet mat, marc’hadmat ha magadus da vat !
(evit 8-10 den)
Aozennoù :
* 250g bleud piz sisez
* Ul litrad dour
* Peder loaiad eoul olivez + un dakenn da fritañ anezhe goude
* Un ivinennad kignen
* Ul loaiad vihan holen
* Pebr diouzh ho c’hoant
* Delioù linad1 pe kignen gouez2 (n’on ket evit mirout da lakaat louzoù er meuzioù…)
Pazennoù :
1 – Peilhit an ivinennad kignen ha skarzhit al lodenn diwanet en diabarzh. Troc’hit an dra-se a-dammoù munut gant ur gontell, pe gwaskit anezhi gant ur gwaskell-gignen3.
2 – Tamoezit ar bleud piz sisez e foñs ur gastelodenn, kuit d’en em gavout gant pouloud goude. Diskennit an dour er gastelodennad bleud tamoezet tamm-ha-tamm, hep mont re brim. Meskit gant ur foued ha lakait takenn-ha-takenn. Lakait ivez al loaiadoù eoul, an holen, ar pebr hag ar c’hignen d’ar poent-se.
3 – Dibabit ur plad da lakaat an toaz-se pa vo poazhet, ur plad karrezek gant bordoù uhel evel unan d’ober « gratin » a zo mat. Lakait un dakenn eoul ennañ hag ingalit mat a bep tu.
4 – Krogit an tan dindan ar gastelodenn, kentoc’h dous e penn kentañ, kuitez d’an toaz da chom peget e foñs, ha meskit gant ur fouet dibaouez.
5 – Pa welit an toaz o tevaat e-barzh ho kastelodenn e lakaoc’h an tan dousoc’h c’hoazh ha e veskoc’h 5 munutenn adarre gant aket.
6 – Pa vez re dev ha pa grog da vezañ re start da zerc’hel da veskañ, lazhit an tan dindan ar gastelodenn ha lakait an toaz tev-se er plad bet eouliet a-raok. Ma vez re a bouloud e c’hellit flastrañ gant ur flastrerez (hini a vez implijet evit ar soubenn) a-raok mont pelloc’h. Klaskit ober ho seizh gwellañ evit sevel ur gwiskad 3 pe 4 santimetr uhelder d’ar muiañ. Ingalit mat war-c’horre gant ul loa pe ur maris4. E plastik eo, gwir eo, met n’em eus ket kavet kenkoulz evit ober al labour-se c’hoazh… Lezit da yenaat div pe deir eurvezh da vihanañ.
7 – Ur wech yen ha deuet da vezañ solut, troc’hit a-dammoù e stumm pe stumm, pe fritez pe bazhigoù pe tric’hornioù… Ha lakait anezhe da fritañ deus an eil tu d’egile. Rouzet e tle bezañ, evel fritez.
Gwechoù ‘zo en em gav re vresk evit bezañ lakaet er baelon. Neuze zo tu da droc’hañ er plad end-eeun ha lakaat anezhañ er forn gant ar grilh evit krazañ war-c’horre.
8 – Debret e vez ar panis e-giz un digor-kalon peotramant en un asiedad gant legumaj kriz, delioù saladenn, greun diwanet ha kinoa. En un asiedad vejetarian e tegas ar panis proteinoù glas (bez’ ez eus kalz a broteinoù er piz sisez) en ur mod dibar ha plijus evit ar re vihan hag ar re vras ivez.
Timothée Messager
1linad = ortie (urtica dioica)
2kignen gouez = ail des ours (Allium ursinum)
3gwaskell-gignen = presse-ail
4maris = maryse (spanell e plastik ma karit)
- Lec’hienn embregerezh Timothée Messager : Tim Lipouz
- Ur rekipe embannet en niverenn 822 – d’an 12 a viz Meurzh 2021.
KOUMANANTIÑ : AMAÑ
