Adsavet e vo an ti-debriñ « La Mère Pourcel », distrujet gant an tan daou vloaz zo. Setu an diviz zo bet kemeret gant kuzul-kêr Dinan. Graet e vo al labourioù warnañ evit bezañ heñvel-mik ouzh ar pezh a oa a-raok gant ar soñj digeriñ en-dro un ti-debriñ er savadur.
Kozh-tre e oa an ti rak savet e oa bet e 1458. N’eo ket an ti evel forzh peseurt hini e Dinan. Anavezet e oa e-touez an holl dier kozh a zo e kreiz-kêr Dinan. Dont a rae an douristed da arvestiñ outañ pa vezent o pourmen o c’halite dre straedoù unan eus kêrioù bravañ Breizh. Un nebeud sizhunvezhioù goude an tangwall e oa bet kaoz a sevel an ti en-dro en e stumm orin.
Un test burzhudus
Ur studiadenn a zo bet roet d’an ti-kêr un nebeud mizioù zo. Klok eo ar studiadenn-se war an doare ma oa bet graet al labourioù tost c’hwec’h kant vloaz zo. Ur burzhud eo, kazimant, rak enni e komprener penaos e oa bet savet an ti, ha gant peseurt danvez, penaos e oa bet troc’het an tammoù prenn, penaos e oant bet staget an eil ouzh egile. Ur sikour vras e vo eta.
Ne grogo ket al labourioù diouzhtu, met a-benn bloaz nemetken. Daou vloaz e padint. Start e vint d’ober, ha koustus ivez, avat. « Ret e vo deomp goulenn yalc’hadoù digant Rannvro Breizh pe ministrerezh ar Sevenadur pe strollegezhioù all » eme maer Dinan, Didier Lechien. « Sikour stalioù, dre ar mesenerezh, a vo goulennet ivez ha setu perak emaomp o klask eus tu Fondasion ar Glad. Met mont a raio en tu-hont da nevesadur ti La Mère Pourcel peogwir e faot deomp ober labourioù war tier all eus kêr Zinan, da lavarout eo glad Dinan a-bezh. » Pourmenadennoù dre straedoù Dinan a vo aozet evit kizidikaat tud Dinan. Displegadennoù a vo roet dezho evel-se evit lakaat anezho da gompren mat ar pezh a zo war ar stern.
JYLG
Ur pennad embannet en niverenn 857, d’an 12 a viz Du 2021.
