Abaoe pevar miz eo toullbac’het Rexhino Abazaj, lesanvet « Gino », ur stourmer enepfaskour albanat, e toull-bac’h Fresnes. Harzet e oa bet e Montreuil d’an 12 a viz Du 2024 gant an Isrenerezh Enepsponterezh (SDAT). Gellout a rafe bezañ kaset da Hungaria. Abaoe m’eo bet harzet e stourm meur a strollad, meur a gevredigezh ha meur a sindikad evit ma vefe dieubet.
Da-geñver « Devezh an Enor » e vez bodet kantadoù a stourmerien nevez-faskour eus Europa a-bezh e Budapest bep bloaz e miz C’hwevrer. Fellout a ra dezho enoriñ un emgann kroget gant soudarded ar Wehrmacht, soudarded SS ha kenlabourerien hungarat, a-enep an Arme Ruz e miz C’hwevrer 1945. Daou vloaz zo e oa bet aozet ur vanifestadeg gant enepfaskourien. Tamallet eo an enepfaskour Gino da vezañ kemeret perzh enni ha lakaet eo bet dindan un urzh herzel europat embannet gant Hungaria evit bezañ « kemeret perzh en un aozadur torfedel » hag evit « taolioù ha gloazioù hag a laka buhez an nen en arvar ».
N’eo ket an hini nemetañ. Seitek enepfaskour·ez zo bet harzet ivez, en o zouez an eurodeputeez italian Ilaria Salis he deus tremenet ouzhpenn pemzek miz en toull-bac’h a-raok bezañ aotreet da chom dindan evezh en he zi, peotramant ar stourmerez enepfaskour alaman Maja1.
E-keit-se eo bet dieubet an neveznazied o doa taget tud d’an deiz-se, hep bezañ tamallet.
Ur prosez direizh e Hungaria ?
An alvokaded a zifenn Gino zo a-enep un dazbroañ2 hag a lakafe anezhañ e kondisionoù nec’hus en un toull-bac’h e Hungaria. Degas a reont da soñj ez eus bet roet gwarantoù diglok gant ar pennadurezhioù hungarat a-zivout e lec’h bac’hañ hag e brosez. Aon o deus rak ur justis ha ne vefe ket neptu, dreist-holl goude komzoù gouarnamant Hungaria a-enep an enepfaskourien.
Ouzhpenn-se eo bet kondaonet Hungaria meur a wech gant Lez-varn Europat Gwirioù Mab-Den, abalamour ma oa emellet3 politikerien ar vro en he reizhiad barnerezhel. Ingal e vez kritiket Hungaria gant Komision Europa ivez evit diskar dizalc’hiezh ar justis dindan ren Viktor Orbán.
Un diviz gortozet
Un emvod a oa e Lez-engalv Pariz d’an 12 a viz Meurzh evit kemer un diviz diwar-benn Gino. Dalc’het ez eus bet kont eus arguzennoù an alvokaded. Divizet he deus al lez-varn asantiñ d’ur goulenn dieubidigezh dindan evezh elektronek. Kemeret e vo an diviz diwezhañ d’an 9 a viz Ebrel.
E-keit-se e kendalc’h ar skoazell da Gino. Dirak al lez-varn e oa kalz a stourmerien hag a c’houlenne ne vefe ket kaset da Hungaria en-dro. Evito eo an afer-se arouez ur stourm ledanoc’h a-enep diorren an enepfaskouriezh en Europa. « Levezon an tu dehoù pellañ hag ar faskouriezh n’eo ket ur spont hag a vez graet anv anezhañ gant ar sindikadoù, ar strolladoù enepfaskour hag ar stourmerien evit ar blijadur », a zispleg Aude, ezel eus an Union Syndicale Solidaire. « Ur riskl eo evit gwir, hag en deus efedoù e buhez an dud a vez taget gant ar c’haozioù kilstourmer, broadelour ha gouennelour. »
N. Gourvenneg
1E-kerzh an hañv 2024 e oa bet kaset Maja eus Alamagn da Hungaria, hep argerzhadur hag hep ma vefe bet kelaouet he c’herent pe he difennerien. E miz Chwevrer 2024 e oa bet kinniget dezhi gant justis Hungaria ur c’hastiz 14 vloaz toull-bac’h ma anzavje e oa kablus. Nac’het he deus. Gellout a rafe bezañ toullbac’het e-pad 24 bloaz.
2dazbroañ : extradition
3emell : ingérence
Ur pennad embannet en niverenn 1034, d’ar 1añ a viz Ebrel 2025.
Skoazell adlenn : Ofis Publik ar Brezhoneg
