45 000 € eo pal ar prantad arc’hantaouiñ lañset evit ar raktres La Maison qui pousse. Betek ar 15 a viz Du 2023 e c’heller reiñ arc’hant d’ar c’hevredad kevelouri a laz stroll-mañ (KKLS)* evit ma vefe krouet ar c’hentañ ti-kazetennoù e Frañs dezhañ ur statud embregerezh e-giz-se. Ouzhpenn 150 den zo aet da gevelour dija abaoe miz Even 2023.
« An ti en deus ezhomm ac’hanoc’h : roit sikour hag arc’hant » a vez lennet eus kroashent kentañ Kastellin, e-kreiz Penn-ar-Bed. War ur banniel gwenn bras eo bet skrivet en 1 kae Jean Moulin, e lec’h m’emañ ar stal kazetennoù ha levrioù, e-kichen stalioù bras hag a sko war straed vras ar gumun. Enni ez eus skritelloù ha flyeroù war un daol vihan evit displegañ ar raktres « La maison qui pousse ». Amañ ez eus klasket sevel ar c’hentañ ti-kazetennoù e Frañs en ur stumm embregerezh a-stroll, ar c’hevredad kevelouri a laz stroll (KKLS).
« Daou vloaz zo ‘moa soñjet e oa poent mont war va leve », eme Frédéric Vasseur, perc’henn abaoe 15 vloaz, a-dreñv ar c’hef. « Sevel ur raktres a-stroll a oa un diskoulm peogwir e vez serret tiez-kazetennoù, evel e Karaez pe e Kemper da skouer, pa vez klasket gwerzhañ ar stalioù. » Koustañ a ra ker-ruz prenañ unan ha ne vez ket gounezet kalz arc’hant goude se.
« N’on ket evit ijinañ e vije serret »
Deuet eo ar soñj da grouiñ ur c’hevredad kevelouri a laz stroll goude bezañ klasket titouroù. Pep hini a c’hell prenañ ul lodenn, 100 € pep hini. Ouzhpenn 150 kevelour a oa d’ar 27 a viz Here 2023 hag o kreskiñ emañ. Anna Le Febvre zo unan anezho. En nevezamzer 2023 e oa erruet er vro, e Sant-Kouled, ha lenn kalz a ra ar stummerez war ar brezhoneg : « Din-me eo pouezus al lec’h-mañ e kreiz-kêr Kastellin, degas a ra buhez er vourc’h. N’on ket evit ijinañ e vije serret. »
Betek ar 15 a viz Du 2023 e c’hell an dud sikour en ur reiñ arc’hant war pajenn ar raktres el lec’hienn Kengo. 45 000 € a garfe La Maison qui pousse dastum, evit reiñ fiziañs d’an tiez-bank. « Ar bazenn gentañ eo. Ezhomm zo muioc’h evit prenañ an ti, ar mogerioù hag an dafar. » En holl e koust 320 000 € met klasket e vo goulenn arc’hant digant an ensavadurioù publik ivez. Bez’ e vefe ar c’hentañ stal gazetennoù o vont da gevredad kevelouri a laz stroll (KKLS) e Breizh hag e Frañs.
Darvoudoù gant arzourien hag arzourezed eus ar vro a vez kinniget eno. E soñj emañ Anna Le Febvre da ginnig lennadennoù e brezhoneg d’ar re vihan. « Seul vuioc’h a vrezhonegerien a vefe er raktres, seul welloc’h e vefe ! »
Manon Deniau
*kevredad kevelouri a laz stroll (KKLS) : société coopérative d’intérêt collectif (SCIC)
Ur pennad embannet en niverenn 961, d’ar 7 viz Du 2023.
Skoazell adlenn : Ofis Publik ar Brezhoneg
