Da-geñver ar Prizioù, aozet gant France 3 Breizh hag Ofis Publik ar Brezhoneg, eo bet roet ar priz kentañ da gKaolila er rummad « Pladennoù kanet e brezhoneg ». Gwriziennet mat er vro eo ar strollad dre m’emañ e bemp ezel o chom e Bro-Pourlet pe e Menez Are. Aet eo Ya! e darempred gant Marion Gwenn a zo unan eus teir c’hanerez ar strollad.
Ya! : Petra a dalv evidoc’h gounit ur priz evel hini « dazont ar brezhoneg » ?
Marion : Ober a ra plijadur, anat deoc’h, ha reiñ a ra kalon deomp evit mont pelloc’h, labourat war kanaouennoù nevez ha seniñ dirak an dud. Ouzhpenn gant ar 1500 € e c’hellimp paeañ hon dleoù, da skouer paeañ Miguel Tangi-De Brito en deus filmet ha sevenet ar c’hlip hon eus graet diwar ar ganaouenn « Pilhoù ». Tu a vo da welet ar c’hlip war ar rouedadoù e penn-kentañ miz Mae.
Ya! : E miz Kerzu e oa deuet ho pladenn gentañ er-maez, met hir a-walc’h eo istor ar strollad dija.
Marion : Er penn-kentañ edomp teir maouez, Anna-Gaïd Daniel, Arzella Abiven ha me. E 2012 e oamp krog da ganañ gwerzioù ar C’hoarezed Gwadeg e straedoù Brest da-geñver gouel bras ar bagoù ha da ganañ er festoù-noz. Ar gwerzioù a glote muioc’h ganeomp eget an dañs. Neuze evit mont war-raok ha gellet bevañ e oa ret deomp sevel ur strollad gant sonerezh ha musizianerezed. Fellout a rae deomp bezañ ur strollad a vicher gant merc’hed nemetken, pezh n’omp ket ken hiriv. Neuze e oa deuet Helène Brunet gant he gitar, Nicola Hayes gant he violoñs ha Danielle Titley gant ar banjo hag a gane ivez. Anna-Gaïd a oa aet kuit dija.
Ya! : Ha deuet oc’h a-benn da vezañ ur strollad a vicher ?
Marion : Helène, Nico ha me a oa « intermitañtezed » rak seniñ a raemp gant strolladoù all met evit Arzella ha Danièle, graet Doun outi ganeomp, e oa diaesoc’h. Arzella a gan war ar bladenn met dibaoe he deus ranket kuitaat ar strollad evit kaout ul labour lec’h ma c’hell gounit he buhez. Doun hag he breur Jack o doa ur strollad all, « Jack Danielle’s Band », hag hiriv o deus digoret un ostaliri e bourk Paoul, an « El Dorado ». Faustine Audebert, he doa graet « Kreiz Breizh Akademi », zo deuet e plas Doun. Kanañ a ra brav-tre ha seniñ a ra gitar boud, pezh a ra kalz evit « son Kaolila » a blij kement d’an dud. War-lerc’h eo aet kuit Hélène ha Doniphan Laporte zo deuet evit c’hoari gitar. N’omp ket ur strollad a verc’hed ken met ne ra ket forzh. An hini emgavet da ziwezhañ evit kemer plas Arzella eo Katell Kloareg, a zo intermitañtez, anavezet mat eo, kanañ a ra gant Baliskis er festoù-noz. Gant he gwaz Fred Boudineau e kasont abadennoù evit ar vugale. Kanañ a ra en ur strollad a sonerezh Iwerzhon ivez. Degas a raio un awen nevez deomp. Cheñch a raio, Arzella a oa barrek-tre evit ijinañ an tonioù. Bremañ omp ur strollad a vicher a bemp « intermitant » ha mignoned omp keit ha ma pado. En arvar emaomp abalamour d’ar politikerezh.
Ya! : Ha penaos e vez krouet ho kanaouennoù ganeoc’h ?
Marion : E-keñver an ton hag ar sonerezh e labouromp a-stroll, pep hini a zegas e vennozh, cheñch a ra gant pep kanaouenn met evit ar SACEM e tisklêriomp a bemp. Estreget ar gwerzioù hengounel e vez skrivet ar pozioù gant ma zad, Gégé Gwenn. Goulenn a reomp digantañ skrivañ diwar-benn maouezed hag a-wechoù e kinnigomp ur sujed dezhañ. Ur pemzek kanaouenn bennak hon eus dija, graet pe war ar stern. Labourat a reomp e-pad dervezhiennoù anvet « rezidañs ».
Ya! : Ha petra a c’hellfemp hetiñ deoc’h evit an dazont ?
Marion : Dre vras eo diaes-tre d’an arzourien mont da seniñ en diavaez eus Breizh. Dek sonadeg bennak hon eus er vro betek fin an hañv. Seniñ a raimp en Emvod ar Gelted en Oriant hag e Pempoull gant Denez Prigent. Abaoe ar penn-kentañ omp bet sikouret gant Tangi Le Cras hag ar bladenn a zeu a vo produet gant Ar Folk, pezh a zo mat-tre evidomp. Bremañ e klaskomp un « troer » hag a lakfe ac’hanomp da seniñ en diavaez eus Breizh.
Laouen a vefemp ivez da vezañ klevet war Ici Breizh Izel rak betek-henn ne dremenomp ket, n’ouzon ket ‘blam petra !
Evit kaout ar bladenn pe lenn ar c’homzoù e meur a yezh : www.kaolila.com
Petra a gont ar c’hanaouennoù ?
— Ar sorserez (hengounel), bet enrollet gant ar C’hoarezed Gwadeg. Istor ur vaouez yaouank hag a vag naered hag a c’hwezh an tan er vro.
— Jane Addams (Gégé Gwenn), istor ur vaouez eus Chicago he deus graet kalz evit ar maouezed hag an dud paour, aet priz Nobel ar Peoc’h ganti.
— Pilhoù (Gégé Gwenn), istor Lina, ur vaouez yaouank eus Boneur a rank mont war an hentoù da-heul he gwaz pa’z a war ar vicher bilhaouaer e-pad ar goañv.
— Ar plac’h div wech eureujet (hengounel), bet enrollet gant ar C’hoarezed Gwadeg. Istor ar plac’h a zimez un eil gwech d’an deiz ma teu he gwaz kentañ en-dro eus ar brezel.
— Caol Ila (Gégé Gwenn), istor Mari Stuart, Rouanez a vro-C’hall hag a vro-Skos bet dibennet e Londrez war urzh he c’henitervez Elizabeth 1añ.
— Frankie & Albert (hengounel amerikan, e saozneg), Istor Frankie, ur vaouez du he deus lazhet he gwaz hag a zo bet didamallet e kreisteiz ar Stadoù-Unanet.
— Anna (Gégé Gwenn), diwar-benn buhez Anna Vreizh.
— Afrika (Gégé Gwenn), istor peder maouez brudet eus Afrika o deus stourmet evit o frankiz.
Ur pennad embannet en niverenn 1034, d’ar 1añ a viz Ebrel 2025.
Skoazell adlenn : Ofis Publik ar Brezhoneg
