Evit ar maouezed

E 2017 e voe embannet ur rentañ-kont gant an DGCCRF – Direction générale de la Concurrence, de la Consommation et de la Répression des Fraudes – o venegiñ eo kazi an holl gwarezioù amzerioù¹ kontammet gant danvezennoù pistrius. Spontet eo bet Gaëlle Le Noane ha diouzhtu he deus bet c’hoant cheñch micher.

Ortofonourez e oa Gaëlle Le Noane a-raok kuitaat he labour ha krouiñ hec’h embregerezh “Marguerite et Cie” e 2018. E Leskonil – e bro Vigouden – eo staliet gant 15 den o labourat eno hiziv an deiz. “Simpl eo ar goulenn : perak o defe ar maouezed da baeañ evit o gwarezioù amzerioù ?” emezi. Krouet he deus un ingaler gwarezioù amzerioù digoust. 2000 a zo staliet hiziv evel e savadurioù tiez-kêr a bep seurt evel Annecy, Montreuil, Evian, Grigny, Aubervilliers, da skouer, met ivez er skolajoù, el liseoù, er skolioù-meur, en toullbac’hoù,…

E kotoñs bio

Abalamour d’ar breskted² ez eus muioc’h eget ur vaouez war dek ha ne c’hell ket prenañ trawalc’h a warezioù amzerioù, ar pezh a zo dañjerus-tre evito evel-just. Ouzhpenn-se ez eus 45 miliard a broduioù amzerioù o terc’hel plastek enno a zo bannet bep bloaz er bed a-bezh, ar pezh n’eo ket doujus ouzh an ekologiezh. Goude enklask an DGCCRF, setu an abegoù o deus kendrec’het an embregerez da grouiñ un ingaler gwarezioù amzerioù digoust e kotoñs bio bevzispennadus³ 100%, hep klor, hep porfum hag hep plastik, evel-just.

Mont pelloc’h c’hoazh

E 2021 e oa bet votet gant Rannvro Breizh staliañ ingalerioù en 245 lise publik ha prevez a gaver er rannvro. Un dalc’h yec’hed foran eo hag ivez un arouez a zoujañ d’an ingalded etre merc’hed ha baotred eo hervez Loig Chesnais-Girard, prezidant ar rannvro. “C’hoant ‘mije e vije kavet an ingalerioù e pep lec’h, memes en embregerezhioù.” a gloz Gaëlle Le Noane a zo bet loreadez priz “Ecovisionnaire” roet gant “Femmes de Bretagne” e 2021.

Evit mont pelloc’h ganti c’hoazh he deus dibabet fiziañ ar pakadurezh hag ergerzhadeg an urzhiadoù da labourerezed ha labourerien nammet eus ar gevredigezh APF – “Association des Paralysés de France”.

NG

¹gwarezioù amzerioù : protections hygiéniques

²breskted : précarité

³bevzispennadus : biodégradable

Ur pennad embannet en niverenn 882, d’ar 6 a viz Mae 2022.

• Prenañ an niverenn-mañ e stumm PDF (1 €) : amañ
• Ar formulenn “Tañva Ya! – 6 € evit 6 miz” (24 niverenn) : amañ
• Koumanantiñ : amañ