Keleier e brezhoneg abaoe 2005

Les lai-orines sont-ti des prinzons pour les peupls ?

Core eune faï ét contance de la lai-orine…

Les deputës votite don pour eune lai q’a të demaçonéy1 par aprés a caoze qe d’aoqhuns jujite q’ole alaet a-rebou de la lai-orine. La lai-orine ét don par-su tout, par-su l’erperzentézon naçiona permier. E, en sour qe tout2, les siens du Consail de la Lai-Orine o lou meniere a yeûs de lère la lai-la sont par-su tertout. A caoze qe les « saïjes » d’astoure ont lou meniere a yeûs d’enterluzer la lai-orine. Coment q’araet të la decide ao Consail-la si qe Jean-Jacques Urvoas, doctou en dret constiqhuçiona tout come, araet të yun des « saïjes » ? Sti-la avaet acertainë3 qe la lai Molac jouraet o la lai-orine e il ét aossi capabl come Alain Juppé ou ben Laurent Fabius, pari ?

Democraciy vs constiqhuçionalists

Meins âillou q’en France, la lai-orine ét eune prinzon contr les peupls e tourne contr-democratiqe. En Espaigne parème. Depés qe le percèsse4 de separt d’o l’Espaigne a enrayë en Catalogne, les espaignolists s’ahuchent « les constiqhuçionalists » e s’apouyent a châqe faï su la lai-orine pour déler su les deheûdists catalans. Les citeyens catalans votent yeûs, pâs-meins, pour les deheûdists5 voteriy aprés voteriy e recllament, dede la, pus fôt de democraciy e lou dret a la deheûderiy… biao qe ‘la n’haiteraet point a la lai-orine ! De la secousse, nen peut dire q’en Espaigne la lai-orine joue contr la democraciy. A-don, a qhi q’un democrate a d’yetr leyaod6 ? A la lai-orine de son payiz ou ben a la democraciy, ao peupl de son payiz ?

E o Reyaome-Uni don ? Lâ-bâs-lâ n-i a point de lai-orine meins eune rassereriy de texes e de lais q’aqhitent de lai-orine. Meins dame, pour les Ecossaez la meniere de lai-orine-la ét eune prinzon. Raport ao referendum come de just ben sûr : Sembele q’i n’araent point le dret de n’en lever eune aotr en-vû la lai-orine du Reyaome-Uni. Ét su qhi qe Boris Johnson s’orine, terjou, pour fere hour su eune deûzieme voteriy ? E, pâs-meins, les Ecossaez votent a-masse pour le SNP e les Scottish Greens a châqe voteriy depés berouéy…

E en Bertègn don ? Le referendum pour la Leire-de-Bertègn seraet-ti constiqhuçiona ? Les especialists ne sont point d’agrë entr-yeûs su le chapitr-la. Châqe semene, n-i a pâs-meins des mereriys bertones a voter pour un referendum. La « Republlique » araet-ti poûr ?

Fabius, contr la lai-orine contr-democratiqe cant q’o taet…. europeyene

Terjou ét-ti ét tout come ebaobissant de vaer qe le Consail de la Lai-Orine francaeze perzidë par Laurent Fabius pllace la lai-orine par-su l’erperzentézon naçiona. Ét-ti le méme Laurent Fabius qi fut contr le le Parchâ de Convenances Constiqhuçiona Uropeyen ? Ét-ti le sien-la qi huchaet qe le parchâ-la seraet eune prinzon pour les peupls e qe, en France, la democraciy devaet avair la permieretë su les texes uropeyens ?

Si qe les lai-orines, en France ou âillou aqhitent de prinzons, il ont d’yetr detoliys, envayéys ao bourier, aoterment d’aotr, p’tit a la fai, ét la burécraciy, la fezanderiy7 e la jujeriy8 qi meneront le monde, point le peupl.

Fabien Lécuyer

Geriaoueg : 1Disneuziet / 2Dreist-holl / 3Kadarnaet / 4Prosesus dispartiiñ / 5Dizalc’hourion / 6Feal / 7Ar melestradur / 8Ar varnourion

  • Ur pennad embannet en niverenn 834 – d’ar 4 a viz Even 2021

KOUMANANTIÑ : AMAÑ

Da lenn

Ya! zo o klask

Da lenn ivez